Jól í Október
Ó, nei heldur betur ekki eitthvað sem mér líkar en sumir virðast þó vera orðnir jólaóðir sem þorskar á þurru landi og syngja jólalög jafnt daga sem nætur. Dettur mér þá í hug hið fornkveðna: "Já, ég vild'að alla daga væru jóhóhóhól, þá gætu allir dansað og sungið jólalaahahag." Eða jafnvel enn betra: "Það er allt að verða vitlaust og allt úr skorðum fer, af'er orðin amma mín, JÓL í OKTÓBER".
Við þessar pælingar rifjast upp fyrir mér frétt sem Ómar Ragnarsson flutti einhvern tímann í gúrkutíð og fjallaði um afrek mannanafnanefndar. Sú hafði þá nýlega leyft ónefnið Októ. Og vitanlega þegar maður sem heitir Októ fer úr fötunum þá er októ ber. Já, mjög slæmur brandari.
p.s. Ég á í gríðarlegum erfiðleikum með að greina á milli hvor er fegurri, Colin Firth eða Hugh Grant...
Óli Njáll 22:26| link
Boltinn og sitthvað fleira
Liverpool á heimaleik gegn Deportivo í kvöld og að sjálfsögðu verður Njallinn í tómu tjóni fyrir framan imbann. Alger nauðsyn að horfa á sýn þessi fáu skipti sem eitthvað merkilegt er í gangi þar. Fer sennilega fljótlega að hætta þessu og nota 4000 kallinn til að kaupa bjór á einhverjum bar yfir meistaradeildarleikjum.
Liverpool er stórfurðulegt í ár. Vinnur alla heimaleiki og tapar alltaf úti, þangað til um helgina er við lögðum Fulham að velli. Ekki man ég hvenær það gerðist síðast að Liverpool sneri 0-2 stöðu sér í hag. Sennilega á síðustu öld og það meira að segja ekki undir lokin á henni. Ég hef trú á sigri á morgun. Deportivo getur ekki skít í ár og við erum á heimavelli. Xabi Alonso, nýja hetjan mín, flengir landa sína. (veit samt ekki hvort hann lítur svo á málin enda er Xabi baskneskur boltamelur en ekki spænskur)
Í sunndagsboltanum síðast var ég dapur og mitt lið tapaði sem er mjög óvenjulegt. Óþolandi þegar að liðið fellur í þá gryfju að ætla að skora bara úr langskotum frá miðju. Það er ávísun á tap - það þekkja allir sem einhvern bolta spila. Verst er að eftir því sem staðan versnar verður trú manna á langskotinn stöðugt meiri. Alveg eins og hjá biblíufíflunum sem verða hvað trúaðastir á Krosslaf og meintan föður hans þegar allir detta niður dauðir í kringum þá.
Hér á Kaplaskjólsveginum er brjálað veður um þessar mundir enda ávallt rok í vesturbænum. Ég sit við gluggann og vonast eftir að kr-völlurinn fjúki í burtu (vonandi í vestur því ef hann færi í austur fengi ég hann inn um eldhúsgluggann). Mér hefur ekki enn orðið að ósk minni.
Minn ástkæri fiskur, sem ber nafnið Bara og býr í vatni með tré og kallast því Bara í trévatni (sem er vitanlega bara fyndið á ensku) virðist vera að ná fyrri styrk eftir veikindi og fór loks upp á yfirborðið til að éta í gær. Þá hoppaði ég um húsið af gleði.
Óli Njáll 10:56| link
------------------
18.10.04
Rógburður og ósannindi
Mér hefur borist til eyrna sá illi orðrómur að bróðir minn Þorgeirsboli sé orðinn of feitur. Því neita ég alfarið og lýsi því yfir að þessi borðstofustóll sem brotnaði undan honum á laugardaginn hljóti að hafa verið gallaður.
Í gærkvöldi bragðaði ég annars Leffe brúnan sem er belgískur bjór sem kostar 269 krónur í ÁTVR. Hann er, í stuttu máli, alls ekki þess virði.
Og eitt að lokum: Þeir sem vilja kvarta undan vetrarveðrinu úti er bent á Inga Ólafsson, aðstoðarskólastjóra VÍ, það segir sig sjálft að þegar hann lýsir yfir vetrarfríi þá byrjar að snjóa.
Eugene Genovese verður seint í miklum metum hjá mér enda skrifar sá maður afar leiðinlegan texta.
Óli Njáll 13:31| link
------------------
