1.5.04

Heilræði fyrir unglinga

Það þýðir ekkert að reyna að fokka í hinum þunglynda vélritunarkennara!!!!!!
Óli Njáll  19:21| link ------------------

30.4.04

Laukur í liðinu

Graham Onions er að spila sinn fyrsta leik fyrir Durham í dag. Gengur vel og kominn með 26/2. Það telst mjög gott, verst að aðrir eru ekki í svipuðum ham.

Dagurinn í dag er yfirsetudagur dauðans. Verð að vinna til 6, sem er ekki gaman. Sökum þess er ég fúllyndur og gelti á hvern þann nemandi sem mælir orð af munni í stofunni.

Ekki var Hannesarprófið neitt skemmtilegra en bækurnar hans, held þó að ég hafi staðið mig sæmilega.
Óli Njáll  14:14| link ------------------

28.4.04

Orðrómurinn í Ræktinni

Áðan fór ég í Ræktina og píndi mig svolítið (eða eiginlega bara mjög mikið). Í Ræktinni var eldri maður með bumbu og skegg sem ekki var sáttur við nýja fjölmiðlafrumvarpið. Sagði hann meðal annars orðrétt: "Þessi helvítis krullutittur er náttúrulega snargeðveikur" og var heitt í hamsi. Ég skyldi reiði hans ágætlega enda heitir hann Jóhannes.
Óli Njáll  15:19| link ------------------

27.4.04

Sigur á Ír

Valsmenn náðu að sigra Ír-inga í kvöld í hörkuleik með 4 marka mun, 29-25. Ágætis leikur og mikil barátta. Menn leiksins voru örugglega ekki dómararnir enda voru þeir æði undarlegir þótt ég haldi að það hafi komið ámóta niður á báðum liðum. Næsti leikur í Austurberginu á fimmtudaginn. Ég þar.

Ég er sennilega að fara að taka dómarapróf í knattspyrnu. Þá kemst ég frítt á landsleiki. Það er ágætt. Líka fínt að geta hjálpað aðeins til við starfið hjá Leikni. Þeir eiga allt gott skilið.

Valur Ingimundarsson mun leiðbeina undirrituðum við b.a. verkefni. Vinnutitill ritgerðarinnar verður kynntur síðar.
Óli Njáll  23:34| link

Um háleit þriðjudagsmarkmið

Nú á eftir held ég út í Nýja Garð þar sem ég á bókað viðtal við einn fremsta sagnfræðing Íslendinga um þessar mundir, Val Ingimundarson. Ég er nefnilega loksins búinn að gera eitthvað í mínum b.a. ritgerðarmálum og ætla að byrja á því að spjalla við kappann enda liggja okkar áhugasvið í sögunni ágætlega saman og hann því kjörinn leiðbeinandi ásamt því að vera hinn fínasti náungi. Fleiri kandídatar koma þó til greina í þetta merka hlutverk að leiðbeina mér í skrifunum. Verða menn þó helst að vera unnendur 20. aldar sögu og þrengir það nokkuð hringinn og útilokar ýmsa góða menn. Þeir sem eftir standa eru þá ásamt Val:
Guðmundur Jónsson: Tölfræðigúru sagnfræðiskorar. Sem myndi á margan hátt henta mér vel enda er ég flestum sagnfræðinemum fremri hvað varðar skilning á tölfræði og stærðfræði yfir höfuð. Einnig get ég vel hugsað mér að skrifa eitthvað tengt hagsögunni á 20. öld.
Eggert Þór Bernharðsson: Gettu betur nörd skorarinnar númer 1. Gæti kannski skrifað hjá honum um sögu Gettu betur og þau miklu áhrif sem keppnin hefur haft á félagslíf í íslenskum framhaldsskólum og sömuleiðis á almenna þjóðfélagsþróun.
Guðmundur Hálfdánarson: Guðmundur er öðlingur mikill og skemmtilegur kennari. Félagssagan hefur upp á ýmislegt að bjóða þótt mér detti í þessum töluðu orðum ekkert í hug.

Þetta eru því þeir sem valið stendur um. Vilji menn koma með tillögur að rannsóknarefnum eða öðrum leiðbeinendum mega þeir gjarnan senda á mig póst.

Óli Njáll  14:09| link ------------------

26.4.04

Um hollenskt krikket

Þar sem enginn annar virðist ætla að sinna þessari upplýsingaskyldu þá sé ég mig knúinn til að skrifa smá pistil.

Margir halda að krikket sé einvörðungu spilað í fyrrum löndum breska heimsveldisins (plús þessir ca. 20 vitleysingar á Íslandi). Það er alrangt. Hollendingar eru nokkuð stórtækir í íþróttinni og er lið þeirra ca. 12-16 besta í heimi. Deildakeppnin í Hollandi er skipt í 5 deildir og nefnist sú efsta Nachenius Tjeenk. Í efstu deild eru 10 lið og meistari síðasta árs var liðið VRA sem sigraði eftir harðan slag við lið Excelsior og Voorburg CC. Liðið sem féll var hið efnilega lið Rood en Wit. Fæstir hér á fróni hafa heyrt um þessi lið nema kannski lið Excelsior sem einnig teflir fram frambærilegu fóboltaliði og hefur stundum leikið í efstu deild. Enn færri vita sennilega að hið gamalreynda knattspyrnufélag Ajax rekur krikketdeild og teflir fram fjórum liðum í hollensku deildakeppninni, flest þeirra liða leika þó í neðstu deildum og því ljóst að Ajax þarf að styrkja sig töluvert til að geta keppt um hollenska meistaratitilinn.

Eins og áður segir eru Hollendingar með ágætis landslið en því miður verða þeir ekki með á ICC trophy keppninni í haust. Hollendingar voru óheppnir í undankeppninni og duttu út á run rate(hlaup/boltar). Alls voru nefnilega 5 lið af þeim sex er tóku þátt jöfn með 2 sigra og því þurfti run rate til að reikna út hver færi áfram. Liðin fimm voru Holland, Namibía, Skotland, Sameinuðu Arabísku furstadæmin og Bandaríkin. 6 liðið í keppninni var svo Kanada sem kom verulega á óvart á síðustu heimsmeistarakeppni. En þar sem John Davison var ekki með Kanada í þessu móti töpuðu þeir öllum sínum leikjum. En hverjir haldið þið að hafi unnið þetta mót og tryggt sér þar með sæti á ICC trophy.

Jú, Bandaríkin. Nánar verður fjallað um lið þeirra síðar.
Óli Njáll  23:06| link

Harðfiskur

Í dag keypti ég mér smá harðfisk í hinni skemmtilegu búð Svalbarða. Sú búð hefur reyndar misst töluverðan sjarma síðan afi hans Björgvins Inga réð þar ríkjum. Engu að síður ágætis harðfiskur þar.
Óli Njáll  21:00| link

Um gæði heilbrigðisþjónustu

Merkilegt er hið stórgóða kerfi heilsugæslunnar í Reykjavík, því er ekki að neita. Nú áðan hafði ég samband við frú Halldórs Ásgrímssonar og ætlaði að panta tíma hjá heimilislækninum mínum, doktor Dodda. Næsti mögulega lausi tími reyndist vera 10. maí. Jájá, eg gat svo sem ekkert mótmælt því og er því á leið til læknis eftir 2 vikur. 2 vikur!!! Annað hvort verð ég þá orðinn alheilbrigður eða dauður.

2 vikur eru nokkuð langur tími og heilsan getur breyst töluvert á þeim tíma. Ég hef því íhugað nýja leið í samskiptum mínum við heilsugæsluna. Héðan í frá hyggst ég ævinlega panta tíma reglulega 2 vikur fram í tímann þegar ég er heilbrigður. Ef heilsa mín er góð þegar kemur að tímanum mun ég einfaldlega afpanta og panta svo nýjan tíma nokkrum dögum síðar en ef ég veikist á tímabilinu er biðtími minn mun minni sökum fyrirhyggjusemi minnar. Þetta mun eflaust virka stórvel.
Óli Njáll  17:13| link

Andpólitískur

Nú áðan rann upp fyrir mér nokuð bjart ljós. Ég átti að vera að lesa stjórnmálaheimspeki fyrir próf. Áhugavert efni, jú vissulega en ég nenni bara engan veginn að lesa það. Reyndar er aðalástæðan sú að bókin eða öllu heldur bækurnar eru prump. Önnur og ekki síður veigamikil ástæða er sú staðreynd að ég er orðinn andpólitískur í seinni tíð. Já, segi og skrifa.

Undanfarna mánuði hef ég ekki nennt að koma að nokkru leyti nálægt stjórnmálastarfi, ár og dagur er síðan ég mætti á fund á vegum flokksins og ekki hef ég hundskast í mótmæli svo mánuðum skiptir. Ég er meira að segja hættur að lesa pólitísk vefrit. Kostir þessa eru vitanlega þeir að ég spara smá tíma enda eyddi maður hátt í 15 mínútum á dag við lestur greina sem skrifaðar voru af hinum ýmsu og mislélegu pennum sem í ofanálag voru iðulega með aðrar skoðanir en ég. Smám saman dró úr þessum lestri, í staðinn fyrir að lesa öll vefritin fór maður að velja og hafna og að lokum var svo komið að ég nennti ekki einu sinni að lesa heimasíðu uvg. Múrinn var lengi vel á daglega listanum en þangað hef ég þó varla litið undanfarna mánuði. Sú síða er ekki lengur kúl eftir að öllum undirflokkunum var sópað út. Breytingar á ritstjórn hafa heldur ekki heillað.

En hvar stend ég þá eiginlega í pólitíkinni núna. Jú, ég er löngu orðinn þreyttur á eigin flokki en guð veit að engir skárri vakostir eru í boði. Mér leiðist græningjaháttur flokksins og vona að álver í Reyðarfirði rísi sem hraðast og helst vil ég tvö stykki og stærri virkjun við Kárahnjúka fyrst menn eru byrjaðir á þessu á annað borð. Í öðrum málum finnst mér flokkurinn heldur ekki vera að láta til sín taka af nokkru viti. Eina sem ég er ánægður með í pólitík er að Þórólfur Árnason borgarstjóri er reglulega á pöllunum á Hlíðarenda og styður Val í handboltanum.

Um daginn var ég spurður hvort ég væri búinn að skrifa undir mótmæli gegn útlendingafrumvarpi ríkisstjórnarinnar. Hér með staðfestist að það hef ég ekki gert og ætla ekki að gera. Ekki það að ég sé eitthvað í nöp við útlendinga heldur einfaldlega nenni ég ekki að lesa frumvarpið og dettur ekki í hug að kvitta undir eitthvað einvörðungu af því að allir í kringum mig eru að gera það. Guð veit að helmingurinn af þeim hefur ekki hugmynd um hverju það er að mótmæla.

En þótt ég sé orðinn andpólitískur og fúllyndur vesturbæingur þá geri mér samt fulla grein fyrir því að það getur ekki verið viðvarandi ástand til lengri tíma. Ég mun snúa aftur og sennilega fyrr en síðar. Sérstaklega fyrst ég er farinn að velta þessum hlutum fyrir mér. Sennilega merki um að pólitískur áhugi minn fari vaxandi á nýjan leik en þangað til:

Ísland úr Nató, herinn burt!!!



Óli Njáll  13:20| link

Rigning í Reykjavík

Skokkaði út í Háskóla áðan og skilaði ritgerð í samanburðarstjórnmálum. Ekki vildi betur til en svo að það fór að rigna og ég því aðeins votur eftir labbitúrinn. En það er allt í lagi, fínt að fá smá göngutúr, hjálpar til við heilsuátákið sem nú er í gangi. Stefni að því að létta mig aðeins fyrir Kenýaferðina.

Próflestur er formlega hafinn og lesefni dagsins er bókin Hvar á maðurinn heima? eftir Hannes Gissursson. Sú bók er fúl en víst ekkert við því að gera, bara lesa lesa og lesa aðeins meira. Annars nenni ég varla í vorpróf núna, er alveg kominn með hundleið á stjórnmálafræði og langar í sumarfrí. En þetta mun þó allt hafast að lokum.

Durham sigraði Nothingham í gær í 1day leik og er því með fullt hús stiga eftir eina umferð. Þetta var góður og öruggur sigur 26 hlaupum munaði á liðunum. Marcus North erkiauli skoraði 54 stig og fær plús í kladdann enda batnandi mönnum best að lifa. Einnig stóðu þeir Mark Davies og Gareth Breese sig vel og tóku báðir 3 wickets en einnig skoraði Breese ein 26 stig.
Næsti leikur Durham er svo gegn Derbyshire í 4daga keppninni og hefst hann á miðvikudag í Derby. Derby er eitt fárra liða sem hefur aumari leikmannahóp en Durham og því ættu mínir menn að vinna leikinn. Nicky Peng mun skora 100 held ég.

Íslandsmótið í handbolta heldur áfram á morgun og ég mæti að sjálfsögðu á Valur-ÍR á Hlíðarendanum. Ekki er ég neitt alltof bjartsýnn enda ÍR-ingar með mjög gott lið og Valsliðið hálf lamað sökum meiðsla þeirra Rolands og Markúsar.
Í yngri flokkum hefur Valsmönnum verið að ganga ágætlega að undanförnu þótt ekki hafi þeir skilað titlum. 2. flokkur náði 3. sæti og 3. flokkur 2. sæti. Framtíðin er augljóslega björt hjá Val. Það er gott.

Best að læra smá núna, jamm.
Óli Njáll  11:14| link ------------------