12.9.03

Ferð út í buskann
Ég er á leiðinni í nýnemaferð í kvöld. Veðurfréttir í gær spáðu stormi í kvöld þannig að þetta verður eflaust áhugavert. Kannski munu stjórnmálafræðigríslingar eins og ég bara fjúka út í buskann. Hver veit? Annars verður þetta eflaust ágætt. Stórsniðugt að hrista fólkið svona saman. Eins gott bara að það sé eitthvað um almennilegt fólk þarna. Eg er ekki viss um það.
Óli Njáll  14:53| link ------------------

11.9.03

Ekki tekið út með sældinni
Að vakna snemma að morgni er leiðinlegt. Sérstaklega þegar maður hefur spilað óheyrilega mikinn fótbolta daginn áður og er allur stirður og stífur. Að ekki sé minnst á ógnarstóru kúluna sem ég hef á hægri kálfa eftir spark frá andstæðingsdjöfli. Mig langar að sofa:(
Óli Njáll  09:23| link ------------------

10.9.03

Boltinn í dag
Sagnfræðistórliðið FC Marwick stóð í ströngu í dag og rétt missti af sæti í úrslitakeppninni. Upp úr stendur þó sætur sigur á íslenskunemum, 6-0. Okkar maður fór hamförum í sókninni og setti þrjú feit og falleg mörk. Sennilega hefði ég átt að spila frammi alla leikina. Ég er langbestur.
Óli Njáll  23:09| link ------------------

9.9.03

Nýjung
Enn og aftur valda hinir kynngimögnuðu vélritunarkennarar usla í tölvudeild og nú með skriflegum vélritunarprófum. Sennilega þau fyrstu í sögunni. En svona er það nú bara, brautryðjendur eru oftast umdeildir. Mér sýnist þó að nemendum hafi mörgum hverjum gengið ágætlega.
Það var einmitt hinn frægi 3-G sem lenti fyrstur í slíku prófi. 3-G er minn eini þriðji bekkur og stendur sig vel. Merkilegt við bekkinn er reyndar svakaleg orkuþörf hans sem lýsir sér í stöðugri matarlyst vissra einstaklinga í bekknum. Hef ég af þessu miklar og þungar áhyggjur. Líður vart sá tími að fólk sé ekki að hesthúsa í sig heilu eldhúsin af fæðu. Já, æskan í dag!!!
Óli Njáll  10:51| link ------------------

8.9.03

Firmakeppni
Í kvöld stundaði ég mikinn fótbolta. Mætti fyrst á æfingu FC Marwick fyrir HM í knattspyrnu og brunaði svo á gervigrasið þar sem lið Hagkaups tók Aðföng í bakaríið 7-1. Ekki skoraði ég mark enda stóð ég plikt mína í vörninni. Annars nokkuð magnaður leikur, lentum fyrst undir nefnilega, 0-1. Síðan mætti ofurmennið Pétur Svansson á staðinn og tók kalla í óæðri endann. Hann kann sko sitthvað fyrir sér, drengurinn sá.
Óli Njáll  23:07| link

Hvalur
Mikið afskaplega er gaman að vera staddur á spurningakeppni þar sem keppandi svarar:"Hvalur". Þetta gerðist einmitt í Kollgátunni í dag, Lyfjafræðingar eiga heiðurinn af svarinu. Og nei, Ágúst Fulgerburg var ekki í þeirra liði.
Óli Njáll  14:42| link

Helvítis þjóðverjar
Já, þeir voru stálheppnir á laugardaginn. Þess má einmitt geta að ég mætti á leikinn og skemmti mér konunglega. Reyndar langt síðan ég fór á landsleik seinast. Kom það aldrei til hugar meðan ógeðsþjálfarinn var við stjórn. Var reyndar á sínum tíma búinn að ákveða að mæta á Ísland Þýskaland og styðja Þjóðverja, réttlætti þá hugsun með því að Dietmar Hamann yrði eflaust í þýska liðinu. En ógeðið hætti og Hamann var meiddur þannig að ég gat haldið með Íslandi með góðri samvisku.
Skírnarveisla í gær hjá Símoni Kristjánssyni Sullca. Þar voru eðalveitingar á borð bornar. Veislur sem bjóða upp á pönnukökur og skinkuhorn fá ætíð hæstu einkunn. Einnig sinnti ég því mikilsvirta hlutverki ljósmyndara í kirkjunni og stóð mig með eindæmum vel, tókst t.d. að dúndra löppinni í kirkjubekk meðan heilagleikinn var sem mestur og hrukku allir kirkjugestir við. Annars er svona kaþólsk skírn nokkuð fyndið fyrirbæri. Eiginlega eins og löng gönguferð þar sem presturinn arkar um alla kirkjuna og gestirnir í humátt á eftir. Heilagur Þorlákur var ákallaður. Það er bara kúl.
Óli Njáll  11:03| link ------------------