7.12.02

Austur, norður, suður og vestur
Já, þannig er dagskipunin í dag. Það er sumsé bók Geir Lundestads sem skal lesin af áfergju. Einnig skal prenta út ritgerðina og henda í hólfið hjá Val, skila nokkrum bókum á hlöðuna og tala við Björn. Við Björn ætlaði ég að tala á laugardaginn síðasta en hef á einvhern óskiljanlegan hátt trassað það alla vikuna, slíkt er undarlegt því Björn er fróður og skemmtilegur maður. Kannski er ég bara orðinn skrýtinn.
Óli Njáll  11:25| link ------------------

6.12.02

Moggafífl
Einhver endemis hálfviti gagnrýnir Valgeir Guðjónsson í Mogganum í dag og þar stendur "Hið þreytandi "Popplag í G-dúr"" Er ekki allt í lagi með manninn? Réttast væri að skjóta hann á færi enda er Popplagið í g-dúrnum eitt hið besta sem nokkru sinni hefur verið gefið út í gervallri tónlistarsögunni. Í Brjálæðishrifningu býð ég þér tópas og berjasaft skilyrðislaust. Já, þetta er sko alvöru tónlist.
Óli Njáll  20:21| link

:)
Var ég búinn að minnast á að litlu jólin í gær voru léleg. Enginn nennti að skreyta og gefa kökur, allir fóru heim að læra undir próf. Ég bullaði í nemendum og át kökur á þeim fáu stöðum sem þær voru í boði. Mér finnst slæmt ef þessi siður ætlar að leggjast af. Árseinkunn á að stórum hluta að ráðast af því hversu vel nemendur standa sig í því að gefa kennurum kökur á litlujólunum, hvort þeir bjóða manni á nemó eða eru duglegir að draga mann í eitthvað tilgangslaust t.d. kaffihúsaspjall eða knattspyrnu. Með brotthvarfi litlujólanna er ein þessara breyta horfin úr fyrirfram planaðri árseinkunn hjá mér og neyðist ég því jafnvel til að vera faglegur. Það er aldrei jákvætt.
Óli Njáll  16:16| link

Steel
Mark Steel er með góða krikketumfjöllun hér. Alger nauðsyn að benda fólki á hana. Sem minnir á það að í dag er síðasti leikur Suður Afríku og Sri Lanka. SA er þegar búið að vinna seríuna 3-1 og Sri Lanka getur ekki neitt þannig að þetta verður ekki spennandi. Helvítið hann Kallis mun eflaust rústa þeim enn og aftur. Indverjar eru komnir til Nýja Sjálands og eru farnir að taka upphitunarleiki. Ég spái óvæntum fyrsta útisigri Indverja síðan á 9. áratugnum(ef frá eru taldir leikir við Bangladesh) og það verður ofurmennið Sachin Tendulkar sem skorar 100 í hverju innings.
Svo virðist sem Huginn sé að ritskoða greinina sem hann grátbað mig um að skrifa, það er kannski ekki slæm ákvörðun. Greinina skrifaði ég á ca. 5 mínútum og notaði tækifærið í geðvonsku minni til að kalla fólk öllum illum nöfnum. Mér þætti þó viturlegt að láta mig vita hvort á að birta greinina eður ei.
Óli Njáll  12:05| link

Loksins
Það lítur út fyrir að ég klári loksins Gorba í dag og geti þá loksins byrjað að lesa undir próf. Sem betur fer er fyrsta prófið ekki fyrr en 12. des en engu að síður er djöfullegt lesefni fyrir það. Eftir það verða hlutirnir skemmtilegir.
Óli Njáll  10:38| link ------------------

5.12.02

Frægir menn sem ég hef hitt
Já, og þar með lauk þeirri upptalningu.
Óli Njáll  17:27| link

Nýyrði
Ekki gerði jöfur íslenskra fræða, meistari Ármann Jakobsson neinar athugasemdir við orðið fyrtur. Lít ég því svo á málið að þessi ritháttur skuli koma í næstu orðabók.
Óli Njáll  17:16| link

Bull
Það var á engan hátt skortur á markaðshagkerfi sem felldi Sovétríkin á sínum tíma. Það sem felldi þau voru geðsjúkir stjórnendur sem sviku hinn sanna sósíalisma og stunduðu í staðinn hernaðarkapphlaup og heimsvaldastefnu af miklum móð. Einungis veruleikafyrtir og ólesnir hægrimenn reyna að kenna skorti á markaðshagkerfi um fall þeirra.Og ég hlæ að einfeldni þeirra.
Óli Njáll  13:38| link

Fimmtudagur
Óska Þóri innilega til hamingju með daginn. Annars er þessi dagur fúll, rigning og rok og ég er syfjaður. Litlu jólin virðast vera dauð hér í marmarahöllinni og aðeins 2 bekkir búnir að skreyta. Það þýðir sennilega að maður fær engar kökur:(
Óli Njáll  08:11| link ------------------

4.12.02

Kvabb
Hvað er málið með ómálga börn að fara að væla í mér? Gelgja með tyggjó, huh? Ég hlæ að fólki sem hefur ekki meira hugmyndaflug en þetta til að móðga mann. Lærðu að tala og þá skal ég eyða fleiri orðum á þig!
Óli Njáll  22:26| link

Litlu jólin
Á morgun eru litlu jólin í VÍ. Það er gaman að þeim. Ég mæti og skipa krökkum að taka vélritunarpróf, geri annars ekkert af viti. Fer síðan og skrifa ritgerðina mína sem nú er að fæðast. Þetta verður dagur dauðans en þeir sem gefa mér kökur fá plús í kladdann og hærri kennaraeinkunn.
Að lokum vil ég benda mönnum á gott framtak stallara míns að selja jólaprófin, ég hyggst taka þetta upp og býð nú öllum sem vilja að kaupa jólapróf á 15000 krónur, einnig má greiða í vörum og er verðið þá umsemjanlegt.
Óli Njáll  20:29| link

4. desember
Í dag er 4. desember og afi minn Njáll Guðnason hefði orðið 95 ára í dag ef hann hefði lifað. Ég fór því út í kirkjugarð og kveikti á kerti, fannst það viðeigandi. Það er alltaf eitthvað fallegt við útikerti á leiðum. Setti líka eitt kerti á leiði ömmu minnar sem ég þekkti nú reyndar aldrei enda lést hún áður en ég fæddist. Það voru fáir á ferli í kirkjugarðinum, sem er bara jákvætt, þá nýtur maður betur kyrrðarinnar í garðinu
Óli Njáll  16:10| link

Málefnalegt svar
Sindri, Ef ég er lúði þá ert þú fífl! (og eins og venjulega færð þú ekki link)
Óli Njáll  16:05| link

Afbragð
Að vanda sinnir háæruverðugur menningarfulltrúi ríkisins starfi sínu af einstakri prýði og bregst fljótt við fyrirspurn konungs, fær hann miklar þakkir fyrir. Í kjölfarið lýsir konungur eftir umsóknum í embætti tónlistareftirlitsfullrúa. Stöðugildi eru jafn mörg og útsölustaðir geisladiska í konungsríkinu. Einn fulltrúi á hverjum stað sem sér um að veita fólki blessun sína eða synjun á tónlistarkaupum. Þeim sem vilja sækja um skulu senda póst á skrifstofu konungs ásamt ítarlegri útlistun á tónlistarsmekk sínum, líkamsburðum og persónuleikalýsingu.
Óli Njáll  14:17| link

Hress
Nú er ég allur að hressast eftir öflugan nætursvefn, að sjálfsögðu með hjálp læknadóps. Það eina sem dregur nú úr hressleika mínum er öll sú vinna sem safnast upp hjá mér. En best að taka þetta í smáum skömmtum og reyna að mjatla þetta niður.
VG er að missa fylgi samkvæmt könnunum, kemur ekki á óvart eftir allan prófkjörsyfriganginn hjá aumingjaflokkum. Einnig kemur það ekki á óvart því ég hef ekki hugmynd um hvað ég er að kjósa ef ég kýs VG, einhverjir frambjóðendur eða eru þeir leyndarmál fram í apríl? Enn hefur ekki verið rætt við mig um framboð, þetta er nú orðið ansi súrt.
Daysleeper er auma sveitin, söngvarinn er einhver gutti sem varð þekktur fyrir að flytja vondan texta illa á einhverri söngkeppni krakkabjálfa, hans hæfileikar eru augljóslega vel faldir ef einhverjir eru. Annars hafa íslendingar furðulegan tónlistarsmekk, hví er Írafár í efsta sæti ásamt Jónínu Guðrúnu?????? Af hverju? AF HVERJU?????
Óli Njáll  11:55| link

jahá, enn og aftur er blogger óvirkur. Takk fyrir það.
Óli Njáll  00:18| link ------------------

3.12.02

Heppni mín á sér engin takmörk
Já, það er sniðugt að leggjast í veikindi rétt fyrir próf þegar maður á líka eftir að skila ritgerð. Þetta hófst allt í gærkveldi þegar ég kom heim úr annars mögnuðum bolta þar sem brjáluðu bræðurnir ásamt hinum gamla jaxli Gumma Hafsteins rúlluðu upp andstæðingum sínum með snilldartöktum, þegar heim var komið fór að bera á stórundarlegum sjóntruflunum. Lét ég mig hafa það en eftir því sem á leið kvöldið ágerðist þetta og allt stefndi í mígrenikast dauðans. Tók ég þá sniðugu ákvörðun að dæla í mig læknadópi og fara að sofa, það virkaði. Ókosturinn var sá að kvöldið átti að nota til að læra. Í morgun vakna ég svo með magakrampa dauðans klukkan ca. 6 og ligg sem öryrki fram að fótaferðartíma sem er rúmlega 7, fór þá útlitið að batna og fór ég og lauk mínum seinustu tímum. Aftur fór að bera á lasleika mínum um hádegisbilið þegar ég hafði náð að vinna vel fyrir hádegi og ljúka prófasamningu og annars konar smáverkum(já, nemendur góðir bæði 3-G og 4-X, nú er hægt að fara að múta mér, prófin ykkar eru tilbúin endanlega) svarið við þessu er að sjálfsögðu að taka stórhættulegt læknadóp og leggja sig, sofa í ca 3 klukkutíma. Það virkar iðulega en ekki nú, ég vakna aftur með hausverk og krankleika. Tók aðeins meira læknadóp. Ég hef því samtals innbyrt 150 mg af kódeini á innan við sólarhring og líður samt illa, þá er nú fokið í flest skjól.
Óli Njáll  20:19| link

Tímamót
Minni formlegu kennslu er lokið á þessari önn, einungis eftir vélritunarpróf og svo jólaprófin sjálf. Mér hefur held ég tekist að komast nokkuð klakklaust í gegnum þessa frumraun minna og ég held að fáir nemendur hati mig og þeir sem vilja læra hafi lært eitthvað. Eftir þetta hlýtur þetta allt að verða miklu auðveldara enda á víst reynslan að hjálpa manni heilmikið í þessu. Þetta er tvímælalaust framtíðarstarfið.
Nú rek ég augun í skilaboðin, sorry publishing is temporarily unavailable. Til hvers að segja eitthvað meira þegar þannig stendur á?
Óli Njáll  11:08| link ------------------

2.12.02

Southampton<
Southampton er á góðri leið með að verða mitt lið í boltanum, þeir eru eiginlega svona annað liðið mitt í deildinni eftir að Coventry féll um árið. Svona lítið lið sem hefur engar stjörnur en eru flottir og Gordon Strachan er hetja. Og Soton unnu í kvöld, til hamingju ég.
Hvað varðar Jerzy Dudek þá finnst mér að menn eigi ekki að bölva honum svona mikið, þessi maður hefur verið stórkostlegur síðan hann kom til Liverpool og er bara í einhverri lægð núna, gott er að gefa honum frí 2-3 leiki til að átta sig á því hvað er að og ná upp sjálfstraustinu. Síðan mun hann koma aftur og jarða þessa deild. Jerzy er engin helvítis hæna.

Óli Njáll  23:30| link

Brandari
Áðan heyrði ég brandara sem hófst svona: "Newton, Einstein og Pascal fóru í feluleik". Hann var alveg svakalega lélegur þannig að ég hlífi lesendum við framhaldinu. Munið það bara ef einhver byrjar að segja brandara á þennan hátt, segið stopp!
Á hlöðunni áðan var allt fullt af fólki sem ég þekki, það er merkilegt hvað maður getur gengið að því vísu að finna einhver gimp að nördast þar. Ég er gimp ca. 10 sinnum á ári og sýni mig þá á hlöðunni.
Á morgun eru síðustu kennslustundir mínar fyrir jólapróf. Það verður svona tími þar sem allir munu spyrja mig út í prófin. Og það verður hundleiðinlegt. Sérstaklega þar sem búið er að semja öll prófin og ég veit því alveg hvað þau þurfa að kunna og hvað ekki, en ekki get ég farið að segja þeim það. Ég verð því að koma með loðinn og tilgerðarleg svör um að þau þurfi að kunna skil á öllu því efni sem farið hefur verið yfir í haust og kunna að flokka aðalatriðin frá aukaatriðum. Voða stuð.
Hér hef ég undir höndum sögufrægt verk. Það nefnist Perestrojka. Höfundur þess er armur maður. Ég syrgi kalda stríðið.
Óli Njáll  19:12| link

Hringavitleysa
Í nótt vaknaði ég upp við það að ég var öfugur í rúminu, sumsé með koddann undir tánum. Eiginlega var ég samt líka á ská og var einhvern veginn böglaður saman þar sem augljóslega get ég ekki legið beinn á ská. Mér þótti þetta skondið.
Óli Njáll  09:27| link ------------------

1.12.02

Salmíak
Bara datt þetta orð í hug.

"verða e-m leppur í annan skó" Svo hljómar orðtak og við spyrjum um merkingu. Svör sendist á netfangið hér að ofan.

Af krikketi dagsins er það að frétta að Ástralir unnu Ashes í dag. Sri Lanka kom á óvart og vann S-Afríku, muralilausir. Ég er glaður yfir því.
Óli Njáll  23:03| link

Lamb
Sárt er það nú ef bændur fá ekkert greitt fyrir jólasteikina, kanski það bendi til að stokka þurfi upp landbúnaðarkerfið. Engu að síður var lambasteik kvöldsins mjög góð og rann ljúflega niður þrátt fyrir að einhverjir bændadurgar séu vælandi yfir sínum kjörum.
Í kvöld eru svo aðventuskemmtanir í öllum kirkjum, slíkar samkomur eru ógn og skelfing í mínum huga. Ég fór síðast fyrir mörgum árum og það var allt fullt af leiðindakrökkum og trúarbulli, jólalög voru reyndar skemmtilegi hlutur dagskrárinnar. Það minnir mig á það að ég er að eignast nýjan prest, þar sem Hreinn gamli er hættur. Ég get vart hulið yfirnáttúrulega gleði mína yfir þessu enda er ég dyggur kirkjugestur.
Óli Njáll  19:57| link

Fall
Jæja, þá er Liverpool að falla í aðra deild. Og eiga það bara skilið eftir að hafa tapað fyrir Diego Forlan. Ég verð geðstirður í dag, önugur og úrillur. En jæja, best að kíkja niður í Verzló og skoða Gorba.
Óli Njáll  14:36| link ------------------