Bullukollurferíhring
Álhús Flajenrong er í ham núna og alveg vitlaus. Að halda því fram að mh sé góður skóli er náttúrulega gersamlega út í hróa hött og í kjölfarið er Egghús Flujenbing settur út af sakramentinu og mun ég ekki tala við þennan mann aftur. Einnig má benda reykjandi hafnfirðingum á að hverfisskólar eru ekki til og hafa held ég ekki verið í nokkur ár. Að auki er afskaplega lélegur rökstuðningur á máli Ákústs þar sem hann ruglar hægri vinstri saman framhaldsskólanámi og háskólanámi sem er bara ekki sami hluturinn, allavega var guðfræði og veðurfræði ekki kennd í framhaldsskólum síðast þegar ég vissi. Einnig verður ágúst ekki mikill maður af því að gera grín að undirstöðuatvinnugreinum þjóðarinnar(já ef þið vissuð það ekki þá lifum við á fiski en ekki gjaldþrota tölvufyrirtækjum). Kanski hljómar fiskflökun 101 og trillurekstur 204 fyndið í hans eyrum en mér finnst þetta aftur á móti stórfín hugmynd. Hvað getur verið slæmt við það að bjóða upp á nám sem getur stuðlað að bættri nýtingu fiskistofna og betri nýtingu þess afla sem berst á land? Ég efast ekki um að fjölmargt fólk væri til í að læra eitthvað slíkt og jafnvel ekki bara landsbyggðarfólk. Og hvað er að því að kenna menningu og sögu heimabyggðar fólks? Nákvæmlega ekki neitt. Það er hverjum manni hollt að þekkja uppruna sinn og hefur ekkert með skáldskap Árna Jóhnssens að gera(sem reyndar er skömminni skárri en leirburður Flyggermans).
Að bjóða upp á framhaldsnám í heimabyggð er einfaldlega stórfín hugmynd. Það eru einfaldlega fjölmargir sem gjarnan vilja stunda nám nærri heimilum sínum en geta það ekki þar sem nám er ekki fyrir hendi. Með því að efla menntun úti á landi er því verið að koma til móts við þarfir þessa fólks og ef það stuðlar að aukinni lífshamingju þessa fólks og í kjölfarið blómstrandi mannlífi í hinum dreifðari byggðum landsins þá er markmiðinu náð, sama hvað aulahúmor flyggarans líður. Það að ungt fólk þurfi að elta allt til Reykjavíkur er stór ástæða fólksfækkunar á landsbyggðinni, það vill kanski ekki flytja í burtu en hefur engan annan raunhæfan kost. Úr þessu ástandi verður svo keðjuverkun þar sem t.d. foreldrar sem vilja búa nálægt börnum sínum flytja á mölina en þetta fólk vildi kanski mun frekar búa á sínu gamla krummaskuði ef þess væri kostur. Í framhaldi af þessari þróun standa svo eftir miljarðafjárfestingar út um allt land t.d. íbúðarhús, skólabyggingar o.s.frv. algerlega ónotaðar og í staðinn þarf að eyða meira fjármagni í uppbyggingu sambærilegrar þjónustu á höfuðborgarsvæðinu sem annars væri ekki þörf fyrir.
Já, Flugenripprapprupp, þú ert landsbyggðarhatari. Það er reyndar stórmerkilegt að teknu tilliti til þess að þú ert hafnfirðingur og þar af leiðandi landsbyggðardurgur sjálfur. Ætli sagan eigi ekki bara eftir að dæma þig geðveikan.
Óli Njáll 12:58| link
Nýársheit
Þeir eru víst fjölmargir sem strengja nýársheit á hverju ári en ég hef hingað til ekki verið einn af þeim, a.m.k. ef ég hef strengt þau þá hef ég svikið þau ansi fljótt. En í ár set ég mér markmið og ætla að reyna að standa við það. Nýársheit mitt er: Að finna 1000 nýjar leiðir til að snúa út úr því furðulega nafni Áthús Flammering.
Óli Njáll 04:26| link
------------------
6.1.02
13
Það er þrettándinn í dag. Til hamingju með það.
Óli Njáll 16:56| link
------------------
