18.11.00

Með röfli má landsmenn styggja
Ökuníðingur alheimsins, Gústus Fljúgaíhring, er enn að röfla yfir umferðarlögunum út af einhverjum "saklausum" bílstjóra á Austurlandi. Málið stendur einfaldlega þannig gústus að þegar menn keyra hraðar en reglur segja til um verða menn að vera viðbúnir því að vera teknir af löggunni og ef það gerist er langskynsamlegast að borga bara sektina. Vinur þinn E, sem greinilega er jafn þrjóskur og þú, hlýtur að vita það sjálfur að hann keyrði of hratt og skynsamlegsti hluturinn í stöðunni fyrir hann hefði verið að borga bara sinn 4000 kall. Þá ætti hann nú 120000 íkr meira inná sinni bankabók.

Þýska hvað
Geir Freysson talar um þýska málfræði og Rögnu Kemp. Þessi pistill hans rifjaði upp vondar minningar frá Verzlóárunum. Ég man að í þriðja bekk var Ragna Kemp einmitt búinn að semja lag um þessar þýsku forsetningar og lét okkur syngja þetta allan veturinn út í gegn. Annars er þýska undarlegt mál. Ég lærði hana í 4 ár og ég kann vægast sagt ekki mikið, jú ég kann á klukku á þýsku. Wie spat ist es? Es ist halb eins.(Ég vona að þetta sé rétt hjá mér)
Óli Njáll  12:28| link ------------------

15.11.00

ordabok
Mig vantaði orðabók um daginn og ákvað að leita að einhvers konar orðabok á netinu. Prófaði að sjálfsögðu fyrst svona dummie dæmi ordabok.is, þá fæ ég enga orðabók heldur heimasíðu einhvers fyrirtækis að nafni mekkano og ég kann engin deili á. Hver er tilgangur hjá þeim að hafa þessa slóð, hún flytur mann bara yfir á mekkano.com.

Margt er skrítið í kýrhausnum
Óli Njáll  03:22| link

Svar
Það sem ég var að fiska eftir var það að þau dóu öll 27 ára. Vissulega er hægt að segja margt annað um þetta fólk t.d. eiturlyfjaneysla, tónlist o.s.frv.
Óli Njáll  03:18| link

Lýðræði
Mér finnst þetta alveg stórmerkilegt með endurtalninguna í Bandaríkjunum. Það virðist vera nokkuð augljóst mál að þessar talningavélar eru ónákvæmur andskoti og þar af leiðandi ekki hægt að treysta á niðurstöður þeirra að mínu mati. Mér finnst það því sjálfsagður hlutur að handtelja atkvæði á þeim stöðum þar sem sýnt er að talningavélarnar eru ekki að virka. Það tekur kanski tíma og kostar slatta af peningum en einhvern vegin finnst mér það vera nokkuð nauðsynlegt í lýðræðisríki að ekki sé hægt að véfengja niðurstöður kosninga.
Óli Njáll  03:17| link ------------------

14.11.00

Gúrkutíð eða hvað
Mér finnst blaðamenn mbl.is vera með þeim lélegustu sem fyrirfinnast í fjölmiðlageiranum. Nú hef ég ekki orðið var við annað en nóg hafi verið að gerast jafn innanlands sem utan að undanförnu og óþarft að telja það allt upp. Síðustu tvö skipti sem ég hef gluggað á mbl hafa aftur á móti verið vægast sagt ómerkilegar forsíðufréttir. Önnur var að napurt væri í Húsavíkurhöfn og hin að einhverjir þríburar væru skírðir úti í rassgati. Af hverju er það einhver stórmerk frétt að einhver bóndahjón á barðaströnd eignist 3 krakka. Frænka mín gerði þetta nú í fyrra og ekki man ég eftir neinu rosafjölmiðlastússi í kringum það enda bara venjulegir Reykvíkingar þar á ferðinni. Ég er hættur að lesa mbl.is og lýsi frati á þá síðu.
Óli Njáll  10:28| link

Loksins
Jæja, þá lýkur lengsta bloggleysi mínu í langan tíma. Rétt að gefa upp svarið við síðustu spurningu. Bernie Sanders er svokallaður independant þingmaður í bandaríkjunum. Hann er eini sósíalistinn á Bandaríkjaþingi og situr ef ég man rétt fyrir Vermont. Nýja spurning dagsins er svohljóðandi: Hvað eiga Janis Joplin, Kurt Cobain og Jim Morrison sameiginlegt?(Ég biðast afsökunar ef einhverjar stafsetningavillur eru í nöfnunum). Annars ætla ég að þakka honum Gnirnegylf (Að hætti Greinars) kærlega fyrir afmælisgjöfina sem keypt var í hjá Kormáki og Skildi. Reyndar hélt ég að Gnirnegylf væri síðasti maðurinn til að verzla í þeirri ágætu búð en svo bregðast krosstré sem önnur tré.

Helgin
Ég fór í leikhús um helgina á Shakespeare leikritið Draumur á Jónsmessunótt. Það er skemmst frá því að segja að ég sofnaði næstum því á sýningunni enda fynnst mér verkið oft á tíðum of fullt af löngum leiðinlegum textarunum. Sýningin má reyndar eiga það að hún var flott. Ég er aftur á móti meira fyrir verk í léttari kantinum t.d. söngleiki og gamanleiki. Eftir sýninguna endaði ég í tvítugsafmæli hjá henni Guðrúnu Gummabeibi og skemmti mér þar ágætlega óölvaður. Ég missti af Silfri Egils á sunnudaginn og er ekki enn búinn að ná mér eftir það.

Skrítið
Það er skrítið með heilsuna hjá manni hvað annað fólk getur haft mikil áhrif á hana. Málið er að ég er með kvef. Eftir að hafa verið með það í rúma 10 daga fóru aðstandendur að heimta að ég færi til læknis því ég gæti þurft pensilín. Eftir það fór mér að líða mun verr en áður og fannst ég vera veikur. Síðan fór ég til læknisins. Hann sagði að ég væri bara með kvef og allt í fína lagi. Þá leið mér mun betur. Núna get ég svo drukkið efedrínmixtúru eins og mig lystir.
Og í lokin. Ég vil leyfa ólympíubox.
Óli Njáll  08:15| link ------------------